سندھ اسمبلی کی قائمہ کمیٹی برائے داخلہ کی چیئرپرسن فریال تالپور نے سابق رکن قومی اسمبلی مرحوم بابل خان جکھرانی کی رہائش گاہ پر پولیس چھاپے کا نوٹس لیتے ہوئے آئی جی سندھ سے رپورٹ طلب کر لی۔ فریال تالپور نے واقعے کی مکمل، شفاف اور غیر جانبدارانہ تحقیقات کا حکم دیتے ہوئے ہدایت کی ہے کہ تمام پہلووں کا جائزہ لے کر حقائق پر مبنی جامع رپورٹ پیش کی جائے۔ انہوں نے کہا کہ چادر اور چار دیواری کے تقدس کو پامال نہیں ہونا چاہیے اور کسی بھی شہری کے ساتھ ناانصافی برداشت نہیں کی جا سکتی۔ معاملات کو قانون اور انصاف کے تقاضوں کے مطابق حل کیا جائے اور ذاتی رنجشوں کو سیاست میں گھسیٹنے سے گریز کیا جائے۔ فریال تالپور نے مزید کہا کہ قانون کی بالادستی اور شہریوں کے احترام پر کوئی سمجھوتہ نہیں ہونا چاہیے، واقعے کے تمام حقائق سامنے لائے جائیں تاکہ کسی کے ساتھ ناانصافی نہ ہو۔
News Source: Express News