عمرہ زائرین کے گردن توڑ بخار اور انفلوئنزا ویکسین کی خریداری میں مبینہ طور پر بے ضابطگیوں پر عمومی ویکسینیشن بند کر دی گئی ہے اور کراچی ایئرپورٹ پر قائم بارڈر ہیلتھ سروسز کاونٹر بھی ہٹا دیا گیا ہے۔ ذرائع کے مطابق سعودی عرب جانے والے مسافروں کے لیے لازمی ویکسینیشن کی خریداری میں مبینہ بے ضابطگیوں کے سبب عمومی طور پر ویکسین کی فراہمی بند کر دی گئی ہے۔ ذرائع نے بتایا کہ اسٹاک میں صرف 4 ہزار ویکسین ڈوز موجود ہے جو نادرا کے پاک آئیڈنٹیٹی ایپ فیس ادائیگی کرنے والوں کے لیے مختص کر دی گئی ہے اور ڈسپنسری میں ویکسین کے لیے ایڈوانس ادائیگی کے حامل مسافروں کی ویکسینیشن جاری ہے۔ ذرائع کا کہنا تھا کہ مذکورہ صورت حال کے سبب کراچی ایئرپورٹ پر ایمرجنسی ویکسینیشن کے لیے قائم بارڈر ہیلتھ سروسز کا کاونٹر ہٹا دیا گیا ہے اور ایئرپورٹ ڈسپنسری میں تمام عملہ بھی فارغ کر دیا گیا تاہم صرف ایک ڈسپنسر اور ایک اہلکار موجود ہے۔ ذرائع نے مزید بتایا کہ ویکسینیشن پروگرام کے لیے تعینات ڈیلی ویجر نوجوانوں کو اگلے احکامات تک نہ آنے کی ہدایت کی گئی ہے۔ واضح رہے کہ عمرہ زائرین کے لیے ویکسینیشن لازمی کرانے کی تاریخ میں چند روز قبل جاری نئے احکامات کے تحت 20 نومبر تک توسیع کی گئی ہے۔
News Source: Express News