پاکستان کی نیشنل سائبر ایمرج رسپانس ٹیم (نیشنل سرٹ) نے سرکاری اداروں کو ہدایت کی ہے کہ وہ سائبر سکیورٹی تحقیقات کے دوران ڈیجیٹل شواہد محفوظ رکھیں، اور خبردار کیا ہے کہ سسٹمز کے ریکارڈ میں تبدیلیاں سائبر واقعات کے فارنزک تجزیے کو متاثر کر سکتی ہیں۔ نیشنل سائبر سکیورٹی ہینڈ بک ۲۰۲۶-۲۷ کے تحت سرکاری اداروں کے لیے لازم ہے کہ وہ متاثرہ انفراسٹرکچر اور متعلقہ تکنیکی ریکارڈ تک بروقت جسمانی اور انتظامی رسائی فراہم کرکے نیشنل سرٹ کی زیر قیادت تحقیقات میں تعاون کریں۔ ہدایات میں کہا گیا ہے کہ سکیورٹی نقب زنی کی وجوہات معلوم کرنے، ان کے اثرات کا جائزہ لینے اور سائبر خطرات کو روکنے میں مدد کے لیے تفصیلی تحقیقات اور ڈیجیٹل فارنزک انتہائی ضروری ہیں۔ سسٹم لاگز میں تبدیلی نہ کریں ہینڈ بک میں سرکاری عملے کو ہدایت کی گئی ہے کہ وہ متاثرہ آلات اور سٹوریج میڈیا کی مناسب چین آف کسٹڈی برقرار رکھیں تاکہ تحقیقات کے دوران ڈیجیٹل شواہد محفوظ اور قابلِ تصدیق رہیں۔ ملازمین کو مشورہ دیا گیا ہے کہ وہ تفتیشی ٹیموں کے شواہد اکٹھے کرنے سے پہلے سسٹم آڈٹ لاگز، فائر وال ریکارڈز یا ڈسک میموری ڈمپس میں ردوبدل یا ان پر اوور رائٹ نہ کریں۔ ایسی تبدیلیاں واقعات کا دوبارہ جائزہ لینے اور یہ معلوم کرنے کی کوششوں کو نقصان پہنچا سکتی ہیں کہ نقب زنی کیسے ہوئی۔ متعلقہ عملے کو فارنزک کے عمل میں مدد کے لیے تفتیش کاروں کو آپریشنل تفصیلات، نیٹ ورک ڈایاگرامز اور واقعے کی ٹائم لائنز بھی فراہم کرنی ہوں گی۔ غیر مجاز رسائی پر پابندی نیشنل سرٹ نے سرکاری اداروں کو خبردار کیا ہے کہ وہ کسی غیر تصدیق شدہ تھرڈ پارٹی وینڈرز یا غیر مجاز عملے کو فعال تحقیقات کے دوران الگ کیے گئے سسٹمز میں مداخلت کی اجازت نہ دیں۔ اداروں کو یہ بھی ہدایت کی گئی ہے کہ وہ نیشنل سرٹ کی تفتیشی ٹیموں کی طرف سے جاری کردہ ہنگامی حفاظتی اقدامات اور تدارک کی ہدایات پر عمل درآمد کریں۔ ہینڈ بک کے مطابق، جب تک باضابطہ سکیورٹی کلیئرنس نہیں دی جاتی، متاثرہ سروسز کو بحال نہیں کیا جانا چاہیے اور منقطع نیٹ ورک کے حصوں کو دوبارہ نہیں جوڑنا چاہیے۔ اس شرط کا مقصد تفتیش کاروں اور سکیورٹی ٹیموں کے واقعے سے نمٹنے سے پہلے سسٹمز کو دوبارہ آپریشنل ہونے سے روکنا ہے۔ سائبر واقعات کی رپورٹنگ لازمی ہے ہینڈ بک سرٹ رولز ۲۰۲۳ کا بھی حوالہ دیتی ہے، جن کے تحت سائبر سکیورٹی کے واقعات کی رپورٹنگ منظور شدہ چینلز کے ذریعے کی جانی چاہیے، جن میں ادارہ جاتی، صوبائی یا شعبہ جاتی سرٹ شامل ہیں۔ رپورٹنگ اور شواہد کو محفوظ بنانے کی یہ ضروریات ان طریقہ کار کا حصہ ہیں جن کا مقصد حکام کو سائبر واقعات کی تحقیقات کرنے، کمزوریوں کی نشاندہی کرنے اور سرکاری اداروں میں ردعمل کو مربوط کرنے میں مدد کرنا ہے۔ یہ گائیڈ لائنز سرکاری اداروں پر یہ ذمہ داری عائد کرتی ہیں کہ وہ متعلقہ ریکارڈ کی حفاظت کریں، تفتیش کاروں کو مطلوبہ معلومات فراہم کریں، اور کلیئرنس جاری ہونے تک حفاظتی اور بحالی کی ہدایات پر عمل کریں۔
News Source: Express News