انسٹاگرام نے ڈائریکٹ میسجز میں اے آئی سانگ کریئٹر نامی ایک نیا فیچر متعارف کرایا ہے جس کے ذریعے صارفین چند الفاظ، کوئی خیال یا اپنے لکھے ہوئے بول ایک مکمل گانے میں تبدیل کر سکتے ہیں۔ اس فیچر میں صارفین اپنی پسند کا مختصر آئیڈیا یا بول لکھنے کے بعد میوزک اسٹائل منتخب کر سکتے ہیں جس کے بعد میٹا اے آئی ان کے لیے ایک نیا گانا تیار کر دیتا ہے۔ تیار ہونے والے گانے کو براہ راست انسٹاگرام چیٹ میں دوستوں کے ساتھ شیئر بھی کیا جا سکتا ہے۔ یہ فیچر خاص طور پر تفریح اور سوشل شیئرنگ کے لیے ڈیزائن کیا گیا ہے۔ مثال کے طور پر صارفین کسی دوست کی سالگرہ، باہمی مذاق یا اچانک ذہن میں آنے والے خیال کو چند سیکنڈز میں ایک مزاحیہ یا منفرد گانے کا روپ دے سکتے ہیں۔ اگر آپ کے پاس یہ فیچر دستیاب ہے تو اسے استعمال کرنے کا طریقہ کافی آسان ہے: 1۔ انسٹاگرام پر کوئی ڈائریکٹ میسج کھولیں۔ 2۔ چیٹ ٹولز میں اے آئی سانگ کریئٹر کا آپشن تلاش کریں۔ 3۔ اپنا خیال، جملہ یا بول درج کریں۔ 4۔ دستیاب آپشنز میں سے میوزک اسٹائل کا انتخاب کریں۔ 5۔ گانا تیار کریں اور اسے اسی چیٹ میں دوست کے ساتھ شیئر کر دیں۔ تاہم، یہ فیچر ابھی ہر صارف کے لیے دستیاب نہیں ہے کیونکہ انسٹاگرام اسے مرحلہ وار پیش کر رہا ہے۔ اگر آپ کو یہ آپشن نظر نہیں آ رہا تو انسٹاگرام ایپ کو اپ ڈیٹ کر کے کچھ وقت بعد دوبارہ چیک کیا جا سکتا ہے۔
News Source: Express News