آئرلینڈ اور اسرائیل کے مابین یوئیفا نیشنز لیگ کا میچ 1-1 گول سے برابر رہنے کے باوجود دونوں ٹیموں کے مابین کشیدگی میں کمی نہ آ سکی۔ سربیا میں شائقین کے بغیر بند دروازوں کے پیچھے کھیلے گئے اس میچ میں ہاف ٹائم کے دوران کھلاڑی آپس میں الجھ پڑے، جبکہ آئرش عملے نے ایک اسرائیلی کھلاڑی پر تھوکنے کا الزام بھی لگایا۔ آئرلینڈ کے کوچ ہیمر ہالگریمسن کا کہنا تھا کہ انہیں لگا جیسے اسرائیلی کھلاڑی شروع ہی سے ان کی ٹیم کو دباو میں لانے اور خوفزدہ کرنے کی کوشش کر رہے تھے، تاہم انہوں نے اپنے کھلاڑیوں کے صبر اور بہترین نظم و ضبط کی تعریف کی۔ دوسری جانب اسرائیلی کوچ ران بین شمون نے ہاف ٹائم کے جھگڑے سے لاعلمی کا اظہار کرتے ہوئے کہا کہ وہ اس وقت ڈریسنگ روم میں تھے اور انہوں نے کچھ نہیں دیکھا۔ دونوں ٹیموں کے درمیان تناو پچھلے ہفتے اس وقت بھی بڑھ گیا تھا جب میچ سے پہلے کی پریس کانفرنس میں اسرائیلی صحافیوں نے آئرش کھلاڑیوں پر نسل پرستی کے الزامات سے متعلق سوالات کیے، جنہیں آئرش حکام نے سختی سے مسترد کر دیا تھا۔ دریں اثنا، آئرش فٹبال حکام ایڈم آئیڈاہ کے ساتھ پیش آنے والے مبینہ نسلی تعصب کے واقعے کی بھی جانچ پڑتال کر رہے ہیں۔ سیاسی تنازعات کے سبب ان دونوں ٹیموں کے مابین مقابلے پہلے ہی زیر بحث رہے ہیں، البتہ آئرلینڈ نے یہ میچز کھیلنے کا فیصلہ برقرار رکھا۔
News Source: Express News