پاکستان میں حکومت کی جانب سے کم قیمت مکانات کی فراہمی، چھوٹے اور درمیانے درجے کے کاروباروں اور کسانوں کو آسان قرضے دینے، برآمدات کے فروغ، آئی ٹی کے شعبے کی ترقی، ڈیجیٹل ادائیگیوں اور بے نظیر انکم سپورٹ پروگرام کے ذریعے مستحق خاندانوں کی مدد جیسے اقدامات قابلِ تحسین ہیں، تاہم معاشی ماہرین کا کہنا ہے کہ ان منصوبوں کی پائیداری کے لیے ٹیکس آمدن میں اضافہ اور معیشت کے غیر دستاویزی شعبوں کو ٹیکس نیٹ میں لانا ناگزیر ہے۔ ماہرین کے مطابق جب تک ملک کی بڑی معاشی سرگرمیاں ایک موثر ٹیکس نظام سے باہر رہیں گی، حکومت کے لیے ترقیاتی منصوبوں کی خاطر مالی وسائل حاصل کرنا مشکل رہے گا۔ ٹیکس میں رعایتیں دینے کے ساتھ ساتھ ان افراد اور کاروباری اداروں کو بھی ٹیکس کے دائرہ کار میں لانا لازمی ہے جو اب تک اپنی آمدن اور اثاثے ظاہر نہیں کرتے، ورنہ ٹیکسوں کا اضافی بوجھ تنخواہ دار طبقے، ٹیکس دہندہ کاروباری اداروں اور عام صارفین پر منتقل ہوتا رہے گا۔ رپورٹ کے مطابق حکومت کی آسان ٹیکس اسکیم بھی توقعات کے مطابق کامیابی حاصل نہ کر سکی۔ پارلیمانی کمیٹی کے سامنے حکومت نے اعتراف کیا کہ اسکیم میں تاجروں کی شمولیت مایوس کن رہی اور اب اس پر عمل درآمد کے لیے سخت اقدامات کیے جائیں گے۔ اجلاس کو بتایا گیا کہ ایف بی آر کے پاس تقریباً 37 لاکھ خوردہ فروشوں سے متعلق معلومات موجود ہیں، جن میں سے 14 لاکھ افراد کے شناختی اور یوٹیلیٹی ریکارڈ بھی دستیاب ہیں۔ اس سے قبل تاجر دوست اسکیم بھی خاطر خواہ نتائج دینے میں ناکام رہی تھی۔ تاجروں کے ساتھ مشاورت، آسان طریقہ کار اور مراعات کے باوجود ٹیکس نظام میں شمولیت کے حوالے سے مزاحمت برقرار رہی۔ بعض کاروباری افراد بدعنوانی، غیر یقینی پالیسیوں اور سرکاری اہلکاروں کی جانب سے ہراسانی کے خدشات کا اظہار کرتے ہیں، جبکہ کچھ کو خدشہ ہے کہ ٹیکس ادا کرنے سے غیر دستاویزی کاروباروں کے مقابلے میں ان کی مسابقتی حیثیت متاثر ہوگی۔ تاہم ان مسائل کا حل ادارہ جاتی اصلاحات ہیں، نہ کہ مستقل ٹیکس چھوٹ۔ رپورٹ میں بار بار دی جانے والی ٹیکس ایمنسٹی اسکیموں پر بھی تشویش کا اظہار کیا گیا ہے۔ جب غیر ظاہر شدہ دولت کو وقتاً فوقتاً رعایتی شرائط پر قانونی حیثیت دی جاتی ہے تو باقاعدگی سے ٹیکس ادا کرنے والوں کو منفی پیغام ملتا ہے۔ نان فائلرز پر زیادہ ودہولڈنگ ٹیکس عائد کرنا بھی کوئی مستقل حل نہیں۔ رپورٹ کے مطابق مالی سال 2025-26 میں ایف بی آر نے تقریباً 13 ہزار ارب روپے خالص ٹیکس جمع کیا، تاہم یہ وصولیاں نظرثانی شدہ ہدف کے مقابلے میں حاصل کی گئیں۔ آئی ایم ایف نے بھی پاکستان میں ٹیکس اصلاحات اور محصولات بڑھانے کی ضرورت پر زور دیا ہے۔
News Source: Express News