سابق قومی کپتان شاہد آفریدی نے بھارت کے خلاف حسن نواز کی شاندار اننگز کو سراہتے ہوئے کہا کہ انہوں نے اعلی معیار کی اور ہر لحاظ سے گولڈ میڈل کے قابل اننگز کھیلی۔ شاہد آفریدی نے سوشل میڈیا پلیٹ فارم ایکس پر اپنے پیغام میں قومی ٹیم کی حوصلہ افزائی کرتے ہوئے کہا کہ کھلاڑی ہمت نہ ہاریں، ٹیم کا مقابلہ کرنے کا انداز بہت پسند آیا۔ انہوں نے حسن نواز کے کھیل کی تعریف کرتے ہوئے کہا کہ یہ ہر لحاظ سے گولڈ میڈل کے لائق اننگز تھی۔ انہوں نے مزید کہا کہ مجموعی طور پر بھارت نے بہتر کرکٹ کھیلی اور کامیابی حاصل کی، لیکن پاکستانی کھلاڑیوں نے بھرپور مقابلہ کیا جو قابل تعریف ہے۔ سابق کپتان محمد یوسف نے بھی حسن نواز کی کارکردگی کو سراہتے ہوئے کہا کہ انہوں نے زبردست کھیل پیش کیا اور بین الاقوامی کرکٹ میں اپنی اچھی فارم کا سلسلہ برقرار رکھا۔ محمد یوسف نے ایکس پر اپنے بیان میں کہا کہ حسن نواز نے بہترین کارکردگی کا مظاہرہ کیا اور پاکستان نے کامیابی کے حصول کے لیے کھیل کے مختلف شعبوں میں مثبت پیش رفت کی ہے۔ واضح رہے کہ حسن نواز نے ایشین گیمز کے فائنل میں بھارت کے خلاف 51 گیندوں پر 96 رنز کی جارحانہ اننگز کھیلی جس میں 7 چھکے اور 5 چوکے شامل تھے۔
News Source: Express News